Ostegunetik ostiralerako gauean, adin txikiko gizonezko batek botila kolpe bat jaso zuen buruan. Induzitutako koman dago orain, buru-hezurra puskatuta. Erasotzaileak –bi emakume eta bi gizon– joan den igandean identifikatu eta atxilotu zituzten, eta aske geratu ziren, kargupean, epailearen aurretik pasatu eta gero. Orain, hamabost egunez behin pasatu beharko dute epaitegitik.
Segurtasun Sailak azaldu du gertakaria Tolosako Rondilla kaleko taberna baten barruan hasi zela, eta atarian amaitu zela, adin txikikoari botilakada emanez. Antza, gaztea bere kabuz etxera bueltatzeko gai izan zen, baina egoerak okerrera egin, eta ospitalera eraman behar izan zuten. Garezurra puskatua du, eta induzitutako koman dago. Erasotzaileen zigorrean eragina izango du gaztearen egoeraren garapenak.