Goizeko lehen orduan ez du eguraldiak batere lagundu Tolosan. Aisialdi taldeek bilera egin dute eta kalera ez ateratzea erabaki dute. «Umeengan pentsatuta» hartu duten erabakia izan dela jakinarazi dute taldeek, gaztetxoak bustita zeudelako, euria ari zuelako eta hotz zegoelako. Bi aisialdi taldek, ordea, Ttenttek eta Kirikiñok, San Frantzisko ibiltokian ikuskizunak eskaini dituzte goizean.
Kazkabarra, Txiribitu, Atsedena eta San Bernardo taldeek jakinarazi dutenez, Ttenttek eta Kirikiñok «ez dute erabakia errespetatu», eta ez diete gainerakoei inongo momentutan jakinarazi aterako zirenik. Gainerako lau aisialdi taldeak ez daude ados atera diren biek hartutako erabakiarekin, «koordinazio falta» egon dela aitortu dute. Bide batez, udalaren jarrera ere salatu dute Kazkabarra, Txiribitu, Atsedena eta San Bernardok, «inor ez zaigulako nola gauden galdetzera etorri». Babes eta informazio falta izan dutela jakinarazi dute taldeek.
