Azken urteetako gainbehera dela eta, aurten hainbat aldaketa egin dizkiote helduen danborradari. Hasi eta bukatu Plaza Zaharrean egin dute eta danborrada eta gero, Zerkausian elkartu dira afaltzeko.
Omenaldirik ere ez da falta izan. Karlos Muñoa omendu dute, azken 46 urteetan Danbor Nagusi izan dena. 1973. urtetik hartu du parte danborradan; danbor jotzaile izan zen lehenengo, eta 1999. urtetik zuzendari lanak egiten ditu. Azken aldiz zuzendu du aurten danborrada. Udaletxeko balkoian lore sorta jaso du Olatz Peon alkatearen eskutik, eta hunkituta ibili da kalez kale.
Horrez gain, Galtzaundi abestia lehen aldiz jo dute danborradan. Baita abestu ere. Bertaratu diren herritarrak ere aritu dira kantuan.