Erlatiboa da eguraldi txarraren eta onaren arteko aldea; nori egiten dion mesede, eta nori kalte. Inauteriei, egia da, bustiak sortzen dizkiola zenbait hutsune. Barrakei bezala. Geltoki plazan, goiz lasaia izan dute, gaur, feriazaleek.
Lasaia eta bustia. Barraken gunea herriko giroaren errepikapena baino ez delako izan, beste behin. Lasaia eta azken unez jantzia da Zaldunita bezpera, baina, aldi berean, badu zirrikituren bat ospakizunentzat. Horregatik bertaratu dira hainbat guraso, aiton-amona eta haur; trantsizio egunari festa ukitua emateko.
Tradizio bilakatutako absurdoa ere bada Zaldunita bezpera, mozorro egunen bezperetan mozorrotzen direnei esker. Eta, atzo, eguerdiak ikusi zituen lehen Pikachuak, autotxokeetako desertua betez.
Horretarako ere bai baitira barrakak: haurrei helduen mundua ukitzen uzteko, eta helduak haurtzarora bueltatzeko.
Inauteriak Asteartitan amaituko diren arren, Tolosako barrakak Piñata igandera bitarte egongo dira bertan. «Iluntzeetan elkartzen da jende gehien, 20:00en bueltan», azaldu zuen Dragoiko arduradunak. Zalantzarik ez du, Astelenita izaten da egunik gozoena beraientzat. Festaren zain dira beraz; erlatiboa baita festarako grinaren neurria bera ere.