Komunikabideoi ere badagokigu gizarteari mezu zuzenak bidaltzea. Gizarte honek baditu gaitz batzuk, eta horiek salatzea ere bada lana. Parekidetasuna lortzeko ere lan egiten du TOLOSALDEKO ATARIA-k. Aniztasunaren alde. Gizonei eta emakumeei tratu simetrikoa ematen ahalegintzen da, edota hobeto esanda, emakumeen ahotsak biltzen ahalegin berezia egiten du.
Gizartearen ikuspegi integratzailea du, eta giza eskubideen aldeko konpromisoa. Alde horretatik, zorrotz eta erantzukizunez jokatzen du informazioetan bereizkeria eragozteko, eta ez du onartzen diskriminazioa bultzatzen duen jokaerarik, edozein motatakoa dela ere: sexuan oinarritua, etnian, erlijioan, kulturan, sexu aukeran edo bestelako gorabeheretan.
Komunikabideek errealitateari begiratu behar diote, eta horren berri zintzoa eman. Lantegi horretan, traba dira topikoak eta aurrejuzguak: errealitatea interesgarriagoa da estereotipoak baino, eta horretan ahalegintzen da.
FESTA GIROAN
Zoritxarrez eguneroko ogia bilakatu da indarkeria sexista. Eraso eta tratu txarrak ez dira onartzen, eta mezu sexistak guztiz gaitzesten dira. Festa giroak berarekin ekarri ohi ditu indarkeria matxista duten jarrerak. Eta denok dugu erantzukizuna. Kuadrillan, lagun artean, bikotean,... honelako jarrerarik ikusi edota bizituz gero, salatzea da bide bakarra.
Joka dezagun zentzuz, disfruta ditzagun inauteriak gogoz, baina guztiaren gainetik, errespetuz.