Gogotsu ekin diete herritarrek inauteriei, eta gogotsu ekin ere lehendabiziko zezen festari. Ikuskizuna hasterako tokia hartuta ziren herritar ugari, eta beste asko, ohi bezala, txarangen erritmora sartu ziren plazara. Aukera egokia azken hori, hotzari aurre egiteko modua baita saltoka eta plazari biraka aritzea. Zezenek hondarra zapaldu orduko soilik ausartenak geratu ziren bertan, eta adardunak zirikatzeari ekin zioten. Gehiegi ausartzeagatik edota irrist egiteagatik adarra gertu ikusi zuenik ere izan zen, ikuskizunari emozioa gehituz.
