05:00etatik, zezen plazako sarreren zain

05:00etatik, zezen plazako sarreren zain

Inauterietako zezen-festetako sarreren %25a gaur jarri dute salgai, Leidorren. Goiztiarrenak 11 ordu eman ditu ilaran.

13 minutuan agortu ziren, joan den astelehenean, internet bidez saldutako sarreren %70a. Gaur beste %25a jarri dute salgai, eta Ostegun Gizenekoak eta Astelenitakoak amaitu dira. Oraindik Zaldunita eta Asteartita egunerako gutxi batzuk geratzen dira.

Goizean goizetik izan da jendea ilaran. Anoetarra zen ilarako lehena, eta lanetik jai hartuta, 05:00ak aldera azaldu da Leidor Aretoko leihatilara. "Azken zortzi urtetatik zazpitan lehena izan naiz ilaran, eta bestean, bigarren", azaldu du.

Internet bidez ere egin zuen saiakera, baina ez zuen sarrerarik eskuratzea lortu: "Garai hauetan sarrera batzuengatik horrela ibiltzea ez da normala. Tortura bat da. Baina umeengatik egiten dut, batik bat, gustura joaten direlako. Urtero joan izan gara", dio.

16:00etan zabaldu dute leihatila, eta segituan agortu dira Ostegun Gizenekoak eta Astelenitakoak. Bihar ere zabalduko dute leihatila, 16:00etan, sarrerak agortu arte.

Sarrerak eskuratzeko beste azken aukera bat izango da. Sarreren %5 zezen plazako leihatilan izango da salgai, ikuskizun egunetan, egunero, 15:00etatik aurrera, agortu arte.

Tolosaldeko albisteak euskaraz, libre eta kalitatez jasotzea nahi duzu?

Horretarako zure babesa ezinbestekoa zaigu. Egin zaitez Atarikide!


EGIN ATARIKIDE!