Urtean zehar lasaitasuna da nagusi Tolosako San Blasen, baina San Blas egunaren bueltan asko dira auzora igo eta bertsolarien saioa edota herri-kirolen emanaldia ikustera gerturatzen direnak. Baita erroskilla edo lepokoak erostera joaten direnak ere. Eztarriko gaitzei aurre egiten laguntzen dutela dio tradizioak, eta egia izan ala ez, ez dira gutxi ohiturari eutsi eta lepoko zein erroskilla bila joaten direnak.
Kondaira
Kondairak dio San Blas kristau martiri bat izan zela, gotzaina eta medikua zen, hain zuzen, eta haur baten eztarriko gaitza mirariz sendatu zuen. Hortik lepokoena. San Blas auzoan ere txukun-txukun izaten dituzte koloretako lepokoak zintzilik eta apaizak bedeinkatuta, hartu eta bederatzi egunez jarri eta gero erretzen dutenek omen dute, gero, eztarriko gaitzei aurre egiteko aukera.
Erroskillak ere elementu garrantzitsuak dira San Blasen. Eta hauek ere eztarriko gaitzei, eztulei, katarroei eta antzekoei, lotuta daude. Izan ere, lehen, eztarriko gaitzak sendatzeko erremedio moduan zintzilikatzen ziren.
Egitaraua
Otsailak 2, ostirala
- 18:00. Txupinazoa..
- 18:30-21:30. Disko festa.
Otsailak 3, larunbata
- 09:30. Diana Konponezinak txarangarekin.
- 11:00. Meza nagusia, bertako produktuen bedeinkapena eginez.
- 12:30. Toka Lehiaketa, auzokoentzat eta elkarteko kideentzat.
- 18:00-21:30. Elustondo anai-arrebak trikitilarien emanaldia.
Otsailak 4, igandea
- 09:00. Txistulariak Tolosako Udalaren eskutik.
- 11:00. Meza, auzoko eta elkarteko hildakoen alde.
- 12:30. Aizkolariak: Iker Vicente eta Joseba Otaegi.
- 12:45. Elustondo anai-arreba trikitilariak.
- 13:00. Angel Peñagarikano eta Aitor Mendiluze bertsolariak.
- 18:00. Bertsolarien bigarren saioa.
- 18:30-21:00. Elustondo anai-arrebak trikitilariak.