Gizonezkoen artean, Richard Oribe igerilari olinpikoa izandakoa izan da txapelketako irabazlea, eta Liher Urbizuk eta Kerman Urretak osatu dute podiuma. Oribe berak ikusmin handia piztu du. Gaztetxoenez inguratuta izan da, eta askok beran idoloarekin argazkiak ateratzeko aprobetxatu dute. Oribek berak irrifarrearekin eta txaloekin erantzun die guztiei.
Emakumezkoetan, berriz, Garoa Etxabe izan da txapeldun; Naroa Etxebestek jantzi du zilarrezko domina eta, brontzezkoa, Leire Zabalak.
Kirol elkarteen sailkapenean, Konporta elkartea izan da onena. Gaude talde bizkaitarrak bigarren egin du, eta ondoren, Ardoi IK talde nafarra sailkatu da. Olatz Peon Tolosako alkatearen eskuetatik jaso dituzte sariak.
Aurrerapausoak emanez
Emaitzetatik harago, kirol egokitua eta, oro har, urritasunak dituzten pertsonen errealitate anitzak bistarazi nahi izan dituzte gaurko txapelketan. "Bai, existitzen gara. Askotan ikusezinak dirudigun arren, errealitatea da", azaldu dute Gipuzkoako Kirol Egokituko Federazioko arduradunek.
Hain zuzen, Federazioak emandako datuen arabera, Gipuzkoako populazioaren %10ak du urritasunen bat: fisikoa, psikokoa, sentsoriala, adimenkoa, garun paralisia edo urritasun mistoren bat. Tolosaldean ere datua antzerakoa da. Hala ere, gizartearen %25ean du eragina, familiarteko edota lagunak kontutan hartuz gero.
Errealitate hori bistaratzea "ezinbestekoa" dela nabarmendu du Federazioak: "Edozein pertsonak du kirola egiteko eskubidea. Lehiatik kanpo ere bai. Tamalez, hori ez da leku guztietan ematen eta hori lortzeko ari gara lanean". Bide horretan, Tolosan ere lanean hasiko direla aurreratu dute. "Tolosako Udalarekin akordioa sinatzear dugu eta dagoeneko bi pertsonarekin hasiko gara lanean".