Urte hasierako aldapa samurtzeko gozokia, askorentzat. Txapelketaren hondarretan bertso-abstinentzia-sindromeari aurre egiteko botika, zenbaitentzat. Eta, beste batzuentzat, galdu ezinezko urteroko zita. Sarrerak eskuan izanda ere, Tolosaldeko bertso zaleak goiztiar bertaratu baitira, gaur, Leidor atarira, eserleku onenak hartzeko ilara egitera. Eta, Andoni Egañak hasierako agurrean "munduko zezen plaza handiena duen herriari" kantatu bezala, bertso zaleek munduko areto txikiena bilakatu dute Leidor.
Oholtzan, Aitor Mendiluze, Beñat Iguaran, Maialen Lujanbio, Andoni Egaña, Amets Arzallus eta Agin Laburu, Amaia Agirreren gidaritzapean. Aretoko eserleku berdeetan, berriz, 800dik gora bertso zale, bi orduko saio egarriz. Eta, eskatutakoa beti jasotzen ez den arren, irribarre gozoz irten da, gaur, entzulea, Leidorretik.
Izan da umorearen gerizpera hurbiltzeko aukerarik, eta baita genero, belaunaldi aldaketa, euskal komunikabide, integrazio nahiz politikaz hausnartzeko gogoetarik ere. Eltzean bat egin dute osagai guztiek, hurrengo urtarrilera begira jartzeko.