"Talde osoak merezi duen sari bat da". Iñaki Moyuaren hitzak dira, Tolosako Erraldoi eta Buruhandiek nazioartera jauzi egingo duela jakin bezain pronto. 25. urteurrena betetzeko bidean da konpartsa, eta lehen aldiz atzerrira bidaiatuko du bere lanaren berri emateko asmoz.
Abuztuko bigarren hamabostaldian Japoniara bidaiatuko du taldeak, Iida Puppet Festa jaialdian parte hartzeko. Gainera, Hiri Txotxongilozaleen Elkartea bilduko da bertan, eta Tolosa ere bilgune horren parte da.
Duela urte bat jaso zuen gonbidapena konpartsak. Jaialdiko aholkulari Tamiko Onagik Tolosara bisita egin zuen eta erraldoiekin guztiz liluratuta geratu zen.
Bidaia garestia izan arren, konpartsak bere osotasunean bidaiatuko du Japoniara: 35 kide, sei erraldoi eta bederatzi buruhandirekin. Bidaiaren kostuei aurre egiteko finantziazioa lortu du, gainera, taldeak. Are zailagoa izango da material osoa garraiatzea, edukiera handiko material pisutsu eta hauskorra baita. Ziurrenik itsasontzi bidez bidaiatuko dute, baina horretarako hilabete eta erdi beharko lukete, eta tartean Sanjoanak daude. Hegazkinez garraitzeko aukera ere aztertzen ari dira.
Ilda izeneko herrian izango da jaialdia, eta desfile handi batean hartuko du parte konpartsak. Bidaia aprobetxatuz, Tokyoko Euskal Etxean emanaldi berezi bat ere egingo dute tolosarrek.