Aurrera Tolosa CF Pilota Elkarteak 100 ume baino gehiago ditu pilota eskolan, horietatik 80 inguru federatuak. Elkartetik garrantzi berezia eman nahi diote formakuntzari, eta helburu horretan hutsune batekin topo egin dute: "Adin txikiko haurrek partidak jokatu nahi baldin badituzte, Nafarroara edo etxetik urrun joan behar izaten dute. Hemen Ataria Txapelketa bakarrik antolatzen da, eta horrez gain, ez dute beste aukerarik", dio Manu Ayertza elkarteko presidenteak. Hutsune hori betetzeko, Gabonetako I. Pilota Topaketa antolatzea erabaki dute: "Topaketa izena jarri diogu alde ludikoa bultzatzeko, eta ez lehiakorra. Horregatik, elkarren aurka jokatu arren ez da txapeldunik izango. Parte hartzaile guztiek jasoko dute kamiseta bat saritan". Lehen urtea izan arren, indartsu hasiko da ekimena, eskualdeko 120 haurrek jokatzeko asmoa azaldu baitute.
Topaketaren nondik norakoak
Aurrebenjaminak, benjaminak eta alebinak banaka jokatuko dute Tolosako Beotibar pilotalekuan. Partida laburrak izango dira, eta egunean bat baino gehiago jokatuko dituzte. Ez da kanporaketa sistemarik egongo, talde txikietako ligaxkak baizik.
Topaketak urtarrilaren 2an hasiko dira, 09:30etik 13:30era, benjaminen lehen jardunaldiarekin. 15:00etatik 17:30era aurrebenjaminen txanda izango da.
Urtarrilaren 3an, 09:30etik 13:30era, alebinen lehen jardunaldia jokatuko da.
Urtarrilaren 4an, 09:30etik 13:30era, benjaminen bigarren jardunaldia jokatuko da, eta 15:00etatik 17:30era aurrebenjaminen partidak.
Urtarrilaren 5an, 09:30etik 13:30era, alebinen bigarren jardunaldia jokatuko da.
Topaketak urtarrilaren 6an amaituko dira, 09:30etik 13:30era, azken jardunaldiarekin.