Hirugarren urtez jarraian, Tolosako Sarek argazki jendetsua baliatu nahi izan du dispertsioaren aurkako aldarrietara herritarra deitzeko. Anaje Urkolak eta Karmele Elizaranek azaldu dutene, hitzorduak oso harrera ona izan ohi du: "Gabonek bereziak izan ohi dira denontzat, eta guk ere baliatu egiten ditugu egunok, oraindik beharrezko diren aldarriak plazaratzeko".
Horrela, bi hitzordu proposatu dizkiete herritarrei. Bata, abenduaren 24ko manifestazioarena: 18:45ean irtengo da, Trianguloa plazatik. Bestea, berriz, Bilboko hitzordua: aurten urtarrilaren 13ak hartuko du, eta egun osoko egitaraua prestatzen dihardute. Eskualdetik bertaratzeko moduen berri emango dute, aurrerago.
Argazkiaren amaieran, mezu bakarra utzi nahi izan dute antolatzaileek: "Garai itxaropentsuan gaude, ez Espainiako Gobernua ematen ari den pausoengatik, baina bai Frantziako Gobernuaren jarrera ikusita. Ea aldarri hauek guztiak plazaratzen ditugun azken urtea den".