San Frantzisko elizaren atarian egin dute hitzordua, gaur, Tolosaldea Bus enpresako langileek. Tolosako autobus geltoki nagusia da, eta berau aukeratu dute, 2014az geroztik lortu nahian dabiltzana eskuratzeko: soldata igoera.
Ana Alkorta ELAko ordezkariak azaldu duenez, "soldata baxua da lan-baldintzak eta egutegia kontuan hartuta". Besteak beste, jai egun askotan lan egin behar izaten dutela argudiatu du elkarretaratzea. Horrela, gaurko mobilizazioa lehen pausoa izan da, enpresako 26 langileen baldintzak hobetze aldera: "Gaurkoaren ondoren zuzendaritzaren erantzunik jasotzen ez badugu, datorren urtarrilaren 8, 9 eta 10ean greba egingo dugu".
Alkortak azaldu du langile guztiek egin dutela bat aldarrikapenarekin. Tolosaldea Bus enpresak eskualdean ematen du zerbitzu, bai Tolosan, eta baita inguruko zenbait herritan ere.