Mugitzeko dira hamabi hilabeteak

Seigarren ikasturtea du Mugi Tolosa egitasmoak eta, asteazkenero-asteazkenero, ibilbide osasuntsuak egiteko kalera ateratzen dira, hirugarren adineko 140 herritar inguru. Gaur opari txiki bat jaso dute, Tolosako Udalaren eskutik: 2018ko horma-egutegia.

Egutegiaren ideia berria da, eta azken urteotan Mugi Tolosak emandako irudiz hornitu dituzte, hamabi hilabeteak. Horrela, egutegiak banatzen aritu dira, Zerkausian, Patxi Amantegi alkateordea eta Christian Fernandez kirol zinegotzia. 500 ale argitaratu ditu udalak.

Aipatzekoa da, gainera, gaurko hitzordura Haurren Hiria proiektuko gaztetxoak ere bertaratu direla. Aurten, bigarrenez, belaunaldi arteko truke sustatzen ari da udala, eta joan den astean hirugarren adineko pertsonak Haurren Hiriako gaztetxoekin elkartu ziren bezala, gaur gazteenek lagundu diete helduenei.

Hurrengo asteazkenean, berriro elkartuko dira, 10:30 eta 11:00etan, Zerkausian.