Tolosako ezkaratz batean sutea piztu zen atzo gauerdian eta, udaltzaingoak bertaratu zirenean, ikusi zuten norbaitek somier bati su eman ziola. Altzaria kalera atera zuten, ezkaratzean sua zabaltzea saihesteko, eta Ertzaintzari deitu zioten jarraian, gertakariaren berri emanez.
Segurtasun Sailak azaldu duenez, suak ezkaratzeko atean eragindako kalteak aztertu zituzten ertzainek eta, minutu gutxira, San Frantzisko pasealekuko garaje batzuetan aurkitu zuten, lekuko batek emandako deskribapenarekin bat egiten zuten gizonezko bat. Sutearen ustezko egilea zelakoan atxilotu, eta Ertzain etxera eraman zuten.
Gizonezkoak 46 urte ditu, eta aurrekari polizialak ditu. Goizean pasatuko da epailearen aurretik, Tolosako epaitegian.