Lehenak, Giro Arte dultzaina taldeko kideak izan dira, eta hauek, Iñaki Salbadorren gidaritzapean, hiru abesti jo dituzte. Lehena, Julian Romanoren Habanera; ondoren, Sakabiren Bidekoa kalejira, eta azkenik, Ziraukiko Jota. Kantu horietako batzuetan, laguntza ere izan dute dultzaineroek, eta hauekin batera aritu dira, Beñat Luluaga trikitixan, Mikel Atxega baxuan, Izaro Urrestarazu panderoan, eta Lierni Muñoa marinban.
Ondoren, Udal Txistulari Bandaren txanda izan da. Gaurkoan, Ion Garmendia izan dute zuzendari, eta honako bi abesti hauek eskaini dituzte: J. Francoren Aintziñeko abestiak eta J. I. Ansorenaren Eltxo Martxa, Howard Whitneyren Mosquito Parade ezagunetik moldatutakoa.
Hauen atzetik, Isitxo Larrañaga Akordeoi Orkestra heldu da, eta hauek ere bi obra jo dituzte, biak hala biak, Isitxo Larrañagak zuzenduta. Lehena, Matyas Seilberren Irische Suite izan da. Ondoren, Franz Liszten Hungariar Rapsodia entzun ahal izan dute ikus-entzuleek.
Oholtza gainera irteten azkenak, berriz, Tolosako Musika Bandako kideak izan dira. Hauek, N. Rimsky Korsakowen Capriccio Espagnol kantua jo dute lehenik. Enrike Arostegi zuzendariaren hitzetan, "Asturias inguruko doinuak biltzen ditu gehienbat". Eta kontzertuari amaiera eman dion kantua, berriz, Venezuelako Joropo doinu dantzagarria izan da. Moises Molerok konposatua, eta Johan de Mejiek moldatua, Musika Bandak lehen aldiz jo duen obra, gaurkoan gainera, Mariaje Rekondok lagundu diete, pianoan. Kontzertuaren nondik norakoak aurkezten, Gorka Otaegi kazetaria aritu da.
Arratsaldean ere jarraituko du musikak nahiz festak Tolosako kaleetan, Malatxo txaranga arituko baita alde zaharreko kaleak girotzen.