Etxeko txikienek ere izan dute Titirijai jaialdian, beste era batera, parte hartzeko aukera. Gipuzkoako Foru Aldundiarekin batera ingurumena lantzeko tailerra egin dute. 11:00etan elkartu dira Topic kanpoaldean, eta goian, ingurumenaren eta birziklapenaren inguruko bideo labur bat ikusi ondoren, berriro ere kanpora atera dira. Bertan, lau gune jarri dituzte, hondakin bakoitzak bere erreinua zuelako, eta horien inguruko azalpenak ere jaso dituzte haurrek. Azkenik, berriro ere gora itzuli dira, eta Topic-eko pedagogia arduraduna den Karmele Cruzen azalpenak entzun bitartean, hondakin ezberdinekin, txotxongilo bat egiteko ahalegina egin dute neska-mutilek.
Helburua, haurrei, sortzen dugun hondakin kopuruaren gaineko ardura sustatzea izan da, birziklapena eta hondakinen sailkapena bultzatu nahian. Cruzen hitzetan, "haurrengan kontzientzia piztu nahi izan dugu, eta horretarako ontzi eta paper ezberdinak erabiltzen ari gara tailerrean". Amaitzeko, gaurkoa, "eskola ezberdinekin hasi dugun epe luzeko proiektuaren lehen urratsa" izan dela azpimarratu nahi izan du.