.jpg)
Idazle bat gai jartzaile, eta beste hiru idazle bat-batean. Bertsolari txapelketak gainerako guztiari itzal egiten diola-eta, Arantxa Iturbe moderatzaileak saio baten moldetan sartu nahi izan zuen, Lizardi kultur elkarteak antolatutako Euskal literatura XXI. mendean mahai ingurua. Horrela, nahi zuten doinu eta neurrian aritu ziren, ia gehienean, Garbiñe Ubeda, Joxemari Iturralde eta Karlos Linazasoro.
Kezkak partekatuz, agurrean –besteak beste, belaunaldi berrien eta literaturaren arteko zubiak sendotu edo berreraikitzeaz–, eta iritzi-bide desberdinak hartuz, ofiziotan: Kazetaritzatik Ubeda, literatura liburuari lotuegi dagoela zehaztuz, eta hitzezko sormena euskarri eta garai berrietara moldatzeko beharraz ohartaraziz; irakaslearen paperetik Iturralde, zaletasuna sustatzeko atzerriko bide berriak proposatuz; eta, liburuzainaren frustraziotik Linazasoro, euskarazko letren kontsumitzaile kopuru eskasa nabarmenduz.