Errigora ekimenaren saskiak eskatzeko epea amaitzear da, eta egitasmoaren berri emateko karpa jarri dute gaur Tolosako Trianguloan. "Errigorak aurten salmentan jarri dituen produktuak ezagutarazteko etorri gara; herritarrei eskuorriak banatu eta erronka horren berri ematea da helburua", azaldu dute Iñigo Telleria eta Anaje Urkola egitasmoko kideek.
Telleriak azaldu duenez, "ekimenak auzolana du oinarri eta Euskal Herri osora hedatuta dago. Nafar hegoaldeko euskararen eta ekoizleen egoera hobetzea da bere helburua, eta oso garrantzitsua da auzolanaren ideia", azaldu du Telleriak.
Zubigintzaren ideia ere azpimarratu dute Telleriak eta Urkolak: "Gipuzkoako, Bizkaiko edo Erriberako errealitate linguistikoa oso ezberdinak dira, eta herrien artean zubiak eraikitzea eta harremanak sortzea ere garrantzitsua da", azpimarratu dute.
Azaroaren 14a da saskiak eskatzeko epea; Tolosan, Laskorain Ikastolan, Samaniego-Orixen, Inmakulada ikastolan, Galtzaundin, Aitzol Udal euskaltegian, Lizardin eta udaletxean eska daitezke, eta baita Errigoraren webgunean ere.