Maila gorenak zipriztindu zituen aretoko hormak, atzo, eta entzuleak gogotsu itzuli dira Leidorrera, 49. Tolosako Abesbatza Lehiaketako lehen saioa entzutera. Ganbera abesbatzek ireki dute egitaraua, polifonia eta folklore sailetako emanaldiekin, eta ahots europarrak izan dira entzungai, hiru talderen eskutik.
Batetik, Ukrainako Sophia Chamber Choir abesbatza aritu da eta, besteak beste, entzuleen arreta piztu dute, polifonian, Erik Esenvaldsen Stars obra edalontzi eta uraren soinuarekin lagunduz.
Esloveniatik, berriz, Carnice Women´s Choir abesbatza bertaratu da Tolosako nazioarteko lehiaketara, eta publikoaren txalo zaparradak irabazi dituzte, polifoniako saio amaieran, ahotsak posizio aldaketekin eta gorputz-perkusioarekin uztartuz. Azkenik, Sansara abesbatza (Erresuma Batua) aritu da, Claudio Monteverdi autore behartuaren Cantate Domino obra ederrarekin saioa irekiz.