Anje Duhalde arrangoiztarra Tolosan izan zen larunbatean, Sormenetik egitasmoaren barruan. Zerkausi azpialdean, Tolosaldeko Arraun Klubaren egoitzan, hitzaldia eskaini zuen abeslariak, eguerdian.
Busti esnatu zen eguna, baina arrangoiztarra ahots beroketekin hasi zenean, atertu eta giroak egonkortzera jo zuen. Jendea ere orduan hasi zen erantzuten, eta Oria ibai ondoko eremua txiki gelditu zen.
Antolatzaileak ere gustura ziren egitasmoak sortu zuen ikusminarekin.
Kultura, euskara eta azoka lotzeko helburuarekin jaio zen Sormenetik egitasmoa Galtzaundi Euskara Taldearen eskutik. Anje Duhalderena laugarren edizioa izan da. Aurrez, Eñaut Elorrieta, Jakoba Errekondo, Xabi Solano, Aiora Zulaika, Jone Gorostarzu, Joxi Ubeda edo Xabier Zeberio pasa dira Zerkausitik.
Musikari lapurtarra elkarrizketatzen Garbiñe Ubeda tolosarra izan zen. Argia astekarian kazetari, entziklopedia egile, diseinugintzan eta idazle moduan ere lan egina da Ubeda. Elkarrekin, Anje Duhalderen musika ibilbidea errepasatu zuten. Lapurtarra luze eta zabal aritu zen, anekdota, bizipen eta pasarte desberdinak gogoratuz. Amaieran, gitarra hartu eta kantu pare bat eskaini zizkien Sormenetik egitasmora agertu ziren herritarrei.
ELKARRIZKETA IKUSGAI
28 Kanala-k eta TOLOSALDEKO ATARIA-k, elkarlanean, larunbateko hitzaldia grabatu zuten. Urriaren 26tik aurrera, solasaldi osoa ikusgai izango da sarean: www.ataria.eus webgunean.
