Mugi Tolosa egitasmoaren IV. egitasmoa aurkeztu dute gaur; bertan izan dira Cristian Fernandez eta Patxi Amantegi Tolosako Udaleko zinegotziak, Asier Bakaikua ekimenaren koordinatzailea eta egitasmoan parte hartu duten bi ikasle eta bi erabiltzaile.
Cristian Fernandez Kirol Zinegotziak III. edizioko parte hartzaile kopurua nabarmendu du: "31 irteera egin ziren eta guztira 345 lagunek hartu zuten parte, II. edizioan baino 63 gehiagok". Asier Bakaikua egitasmoko koordinatzaileak azpimarratu du emakumeen portzentaia handiagoa dela eta gizonezkoak animatu ditu: "Ez eduki beldurrik. Denok mugitu behar dugu, eta guztion artean harremanak sortu. Eta hori guztia gazteekin bada, hobe".
Patxi Amantegi alkateordeak ikasle boluntarioen lana ere nabarmendu du, eta garrantzitsutzat jo du belaunaldi ezberdinen arteko elkarlana bultzatzea eta eskola ezberdinek proiektu berean lan egitea. Duela urte batzuk Herrikide ikastetxea hasi zen egitasmo honetan parte hartzen, eta Laskorain Ikastola eta Inmakulada Ikastetxea ere batu ziren: "Emaitzak ikusita, beste ikastetxeak ere gonbidatzen ditugu egitasmo honetan parte hartzera".
Ekimenean parte hartu duten bi ikaslek hartu dute hitza. Eneko Agirre Herrikide ikastetxeko ikasleak kalean ibiltzeko dituzten oztopoak nabarmendu ditu; Laxi Arakama Inmakulada Ikastetxeko ikasleak, berriz, adierazi du "interesgarria" eta "polita" dela egitasmoa, gazteekin ez ezik, helduekin ere harremanak sortzen direlako.
Anjel Izagirre eta Mari Jose Jauregi Harizpe elkarteko eta Iurramendi egoitzako kideak dira, eta egitasmoan parte hartzen dute: "Jubilatu guztiak animatzen ditut egitasmoan parte hartzera; astean behin ibilbide hau egitea oso ondo etortze zaigu", adierazi du Izagirrek. "Bizi eta pozik sentitzen gara. Hurrengo asteazkenera arte!", agurtu du Jauregik.