Amarotz eta Berazubi auzoen arteko oinezko bideari segurtasun eta erosotasuna emateko helburuz, joan den urtarrilean hasi zituzten eraberritze lanak. Lehen fasea amaituta, Martin Jose Iraola kaletik Kondeaneko aldaparainoko zatia konpondu dute, batez ere, espaloiak zabalduz, errepidea estutuz, bi bideen lotunea hobetuz, kaleko argiak berrituz eta seinaleak ezarriz. Zati horren aurrekontua 370.122 eurokoa izan da, guztira, eta urtea amaitzerako falta diren beste bi zatiak eraberrituko dituztela jakinarazi du Tolosako Udalak.
Batetik, Iurreamendi egoitzako sarreratik suhiltzaileen biribilgunerainoko zatia konponduko dute eta, azkenik, Berazubiko biribilgunearen eskuineko espaloia ere eraberrituko du udalak. Bi esku-hartze horiek, guztira, 123.551 euroko aurrekontua izango dute.