Tenporak taldeko kideak Tolosa eta Donostiakoak dira eta irailaren amaieran aurkeztuko dute hamar kantuz osatutako Itzulika auto-ekoizpena.
Kontzertu "berezia" izango da, disko kaleratu aurretik eskainiko baitute emanaldia. Uztailean Beasaingo Igartza jauregian eskaini zuen lehen zuzenekoa, eta bigarrena, ostiral honetan izango da Lesakako Plaza Zaharrean, 20:00etan.
Kantuek pop eta jazz erritmoak dituzte eta elektronika eta rock progresiboa ere nahastu dute kantuetan. Diskoa Beasaingo Pottoko estudioan grabatu dute Fredi Pelaez musikari eta soinu teknikariarekin. Halaber, Karlos Linazasoro eta Harkaitz Cano idazleekin ere elkarlanean aritu dira kantuen hitzak sortzen.
2013ko martxoan elkartu ziren lehen aldiz; lau urte hauetan maketa eta lehen diskoa (Mundu Berria, 2015) argitaratu dituzte, "soinu sendoaren bilaketa prozesua" abian jartzeko asmoz. Disko honetan, beren "heldutasuna" ikusi ahal izango da.