2.000 izokinkume askatu dituzte gaur, Tolosan, Gipuzkoako Foru Aldundiko eta Tolosako Udaleko kideek, gerturatutako haurren laguntzarekin. 1940. urte inguruan Urumea eta Oria ibaietan desagertu ziren izokinak berreskuratzeko proiektuaren barruan kokatu dute gaurko ekintza.
Gaur askatutako kumeek urtebete inguru emango dute ibaian, eta udaberrian jaitsiko dira itsasora, Ipar Atlantikoratz, hain justu. Han urtebete egin eta gero itzuliko dira jaiotako ibaira.
Zailtasunak
1940. urtean erabat desagertu ziren izokinak Hego Euskal Herriko ibaietan, Bidasoan izan ezik. Presa artifizialak eta migrazioa dira euren etsai nagusiak eta Gipuzkoako Foru Aldundiak, ondorioz, urte hauetan eraikitako presa artifizialak desegiten saiatzen ari dela esan du. XX. mendearen erdialdera arte izokinak ikustea arrunta omen zen, baina industrializazioren ondoriozko kutsadurak ia desagerrarazi egin zituen.
Foru Aldundiak azaldu duenez, izokinek Orian gora egin eta Tolosaraino iristeko duten oztopo nagusia Irurako presako arrain eskaileraren funtzionaltasun kaskarra da. 2016. urtean La Salvadorako presa ireki izanari esker, eta izokinei egindako radiomartzeari esker, espeziea Iruraraino igo dela egiaztatu ahal izan dutela ere esan dute.