Herman eta Candelaria Zappek 2000. urteko urtarrilean ekin zioten, beren bizitzetako bidaiari. Esaldi tipikoegia dirudi, baina, bi argentinarren kasuan, egia biribila da: sei hilabetean Argentinatik Alaskara iristeko asmoz irten, eta 17 urte daramatzate munduan barrena, 1928. urteko auto batekin. Bidaiatzeaz gainera, noski, familia hazi eta hezi ere egin dute ibilgailuan, eta sei kideak bizi dira bertan. Bidaia amaitzera doaz, Argentinara itzultzeko, eta Tolosako Trianguloa plazan geldialdia egin dute gaur.
Ikusmin izugarria piztu du autoak, baina, batez ere, Herman Zappen kontakizunak: "Irten ginenean, jende guztiak esaten zigun egun bakar bat ere ez genuela bidaian egingo, auto zahar horrekin. 50 kilometro egin, eta gurpila hondatu zen", zioen barre artean. Bikoteak autoak konpontzen jakin ez, eta mekaniko bati eraman zioten ibilgailua; Graham autoak, ordea, egurrezko gurpil-egiturak ditu eta, azkenean, arotz batek konpondu behar izan zien gurpila.
Horrela, kontinente, klima eta orografia guztiak zeharkatu dituzte, Detroiten egindako auto miresgarrian; 70 herrialdetik gora bisitatu dituzte. Aipatzekoa da, gainera, familia hazi den heinean – Pampa, Tehue, Paloma eta Wallaby seme-alabak izan dituzte urteotan guztiotan–, autoa bera ere egokitu egin behar izan dutela: 40 zenimetro estutu zuten, autoari luzea handiagoa emateko; halaber, autoaren gainaldean logela bat sortu zuten, eta bertan lo egiten dute neska-mutilek. Hala ere, aipatzekoa da urteotan guztiotan, autoaz gain, 2.500 hotel eta aterpetan ere hartu dutela ostatu.
Joan den urtarrilean Bartzelonara heldu ziren, eta gero Espainiako beste zenbait txoko bisitatu dituzte. Gaur, Tolosako Trianguloan, larunbat goizeko ezustekoa izan da Zapp familia, eta bertan azaldu dute bidaia amaitzera doala. Urte amaieran, behin betiko Argentinan bizitzen jarriko dira, beren seme-alabek bizileku egonkor bat izatea zer den ere ikas dezaten.
Beren bizitzaz eta bidaiez informazio xehatua eskaintzen du Zapp familiak, www.argentinaalaska.com webgunean, eta beren liburua ere eskuragarri da bertan: