Ikastetxe publikoa da Samaniego, eta eraikina Tolosako Udalarena da. Ikastetxeko zuzendariak azaldu duenez asteburuko gertakarien jakinaren gainean dago udala gainerakoetan gertatu bezala, "beraz berari dagokio zer gertatu den ikertzea eta neurriak hartzea".
Ikastetxea zabalik egoten da asteburuetan, eta edonork du bertako azpiegiturak erabiltzeko aukera. "Ikastetxekoa izan edo ez izan, herritar asko etortzen da jolastera bertara, eta guri oso ondo iruditzen zaigu, guztion eraikina baita. Gustatuko litzaigukeena da denek horrela sentitzea, denek sentitzea guztiona dela", azaldu du Menendezek. Ikastetxeko zuzendariak esan duenez, "pena" da horrelakoak gertatzea, izan ere, "agian asteburuetan itxi egin beharko litzatekeela pentsatzera eramaten gaituzte".
Patioa eraldatzeko proiektuarekin ari dira, gainera, Samaniegon. "Gurasoekin batera egin dugun proiektua da, natura gertuago sentitzera bideratu nahi dugu patioa. Beraz, ilusioz gaude proiektu berriaren aurrean, baina, aldi berean kezkatuta, horrelakoak errepikatu daitezkeela ikusita".