El Correo agerkariak papereko edizioan argitaratu duenez, Juan Kruz Mendizabal Kakux bere jaioterrian da, itxialdiko monasterioa utzi eta gero. Adin txikikoei gehiegikeriak eta ukitu sexualak egitea egotzi zioten Tolosako Santa Maria parrokian apaiz izandakoari, eta zenbait asteren buruan bere burua erruduntzat jo zuen Kakuxek. Orain, mediku batek tratatuko du.
Fiskaltzak erdietsi zuen Mendizabalen abusuak preskribatuta zirela jada, eta kasua artxibatzea erabaki zuen. Kontrara, ordea, justizia eklesiastikoak prozesua zabaldu du oraindik. Hain zuzen horregatik, Kakux Gipuzkoatik erbesteratu zuten monasterio batera, eta beste elizgizon baten tutoretzapean, terapia psikologiko eta espirituala egiten aritu da, orain arte.