Hori baino lehen, erraldoiek, Musika Bandaren laguntzarekin, balts ikusgarri bat eskaini diete bertaratutakoei, geroago Euskal Herria plazan egin duten berdina. Horrela, prozesioarekin jarraitu dute. Herritarrak kalearen bazter banatan kokatu dira, prozesioa ikusi eta irudiak hartzeko. Eta prozesioan, erraldoiak, santuak bata bestearen atzetik, dantzariak eta Musika Banda. Guztiak ere udalbatzako ordezkariek lagunduta.
Prozesioaren une askotan, hain justu San Joan santua eskopetari konpainien paretik igaro denean, tiro ugari entzun dira. Amaieran, tiro horiek tiro bakarrean bihurtu dira, eskopetari guztiek Euskal Herria plazan botatako tiro erraldoiarekin. Bertan gainera, jende ugari bildu da, eta bitxia izan da erraldoiek dantza egiten zuten une berean, buruhandiak zinegotzi ugarirekin eta alkatearekin dantzan ikustea. Bitxia bezain polita.