Kanpai hotsekin batera lehen notak jo dituzte Tolosako Musika Bandakoek eta sua piztu dute plazaren erdian. Lehenik, Udalbatzakoek egin dute salto suaren gainetik, eta herritarrak izan dira jarraian egin dutenak. Urduritasun, emozio eta desio artean pasa dira guztiak txinparten artetik.
Suari garra itzali zaionean ekin diote Udaberri Dantza Taldekoek. Hauen ondoren iritsi dira David Azurzak gidatzen duen Hodeiertz abesbatzako kideak. Ikuskizunaren amaieran, abesbatzakoek San Joan Zortzikoa kantatu duten bitartean, Udaberriko dantzari batzuek, izen bera duen obra dantzatu dute. Txalo zaparradarekin amaitu da Andre Mari plazako ikuskizuna.