Miguel Induraini omenaldi moduan emandako oparia, zinta mozketa, agurra eta suziria. Ez zen ezer gehiago falta aurtengo 'Abraham Olano - 11 mendate' martxari hasiera emateko. Aurretik 200 kilometro zituzten zain lasterkariek, Gipuzkoako eskualde ezberdinak gurutzatuz egin beharrekoak. Luzea, baina aldi berean, lasai egitekoa. "Gipuzkoan ditugun mendate ezezagunak igotzeko eta paisaiez gozatzeko aukera bikaina", Aitor Ayerza, Oriako Txirrindulari Eskolako Lehendakariaren eta gaurko probako antolatzailearen esanetan.
Arkuaren azpian, lasterkariak zeruari begira zeuden, atertuko ote zuen edo ez jakin nahian. Hasi baino lehen, bizikleta prestatzen azken ukituak ematen aritu direnak ere, aterpe bila ibili dira, euriak ez harrapatzeko. Guztiak, Xabier Usabiagak seinalea noiz emango zuen zain. Ehundaka lasterkari azkenean bertan. "Ez nuke zehatz mehatz esaten jakingo zenbat etorri diren, ez dut zerrenda begiratzeko astirik ere izan", azaldu du Ayerzak, eta gehitu du "Alakanteko mutil batek hoteletik deitu dit goizean, irtengo ziren ala ez jakiteko, eta azkenean etorri da".
Aurtengoa, laugarren edizioa da, eta egun osoan zehar, Usabal Kiroldegia txirrindularitzako zaletuen bilgune izango da. Kiroltasuna nagusi, giro bikaina ez da faltako ibilbide guztian zehar, eta gainera, trafikoan ez du eragin handirik izango. "Autoen norabidea errespetatu beharra daukagu, ez delako lasterketa bat, martxa bat baizik".