Tolosa CF-ren lehen taldea maila galtzeko arriskuan dago. Harrobia, aldiz, oso indartsu dator. Lau taldek mailaz igotzea lortu dute behin denboraldia amaituta.
Euskal Ligako jubenilek denboraldia bigarren postuan amaitu dute. Emaitza horiei esker, hurrengo denboraldia nazio mailako ligan jokatuko dute; Athletic B edo Reala B bezalako aurkariak izango dituzte hurrengo urtean. Aldi berean, lehen mailako jubenilek ere mailaz igotzea lortu dute eta 2017/18 denboraldia Gipuzkoako ohorezko mailan jokatuko dute.
Kadeteei dagokienez, iragan larunbatean ohorezko mailako liga bereganatu zuten Realaren aurkako finala 0-1 irabazita. Euskal Ligako taldea izango da, beraz, hurrengo denboraldian. Aurkariei begiratuta, Reala, Athletic, Antiguoko, Eibar edo Alaves bezalako taldeak izango dituzte aurkari.
Azkenik, lehen mailako kadeteek ere mailaz igotzea lortu dute, igoera fasea lehen postuan amaitu ondoren. Jauzi honi esker, denboraldi berria ohorezko mailan hasiko dute.