Bederatzigarren aldiz, Orio eta Tolosaren arteko zubi izango da ekaineko lehen asteburua, Bisiguaren festaren karietara. Txinparta elkarteak antolatuta, eta Tolosako Udalaren laguntzaz, Zerkausia jantoki erraldoi bilakatuko dute, eta parrilak izango dira protagonista, bisigua Orio estilora erretzeko. Xixario eta Katxiña erretegien abileziarekin batera, gainera, aurten Aingura gunea nobedade izango da: galiziar gastronomia dastatzeko txokoa.
Sukaldari galiziarren eskutik, itsaskiak, olagarroa nahiz edariak izango dira, Zerkausian bertan, itsasoko jaki preziatuen zerrenda osatuz. Jantokian, berriz, 600 pertsona inguru elkartzea aurreikusi dute antolatzaileek; guztira, 320 bisigu inguru erreko dituzte, Orio estilora. Bisiguak parrila gainean pasatzen duen denboragatik, eta bisigua erretzeko moduagatik da bereizgarri, arrain preziatua erretzeko modu hori.
Horrela, 50 euroko menua osatu dute, bisiguaren inguruan. Hasteko, antxoak dastatuko dituzte, gatzetan, eta tomate entsalada hegaluzearekin, ondoren. Nafarroako zainzuriak ere izango dira, eta jaki nagusia zerbitzatuko dute gero –bisigua parrilak–, eta Bixigoxo postrearekin biribilduko dute otordua. Janaria lagunduz, ardo beltza, txakoliña, sagardoa, ura eta kafea izango dira.
Txartelak eskuragarri daude jada, Tolosaldea Tour bulegoan. Hara bertaratuta, 943 69 74 13ra deituta nahiz tour@tolosaldea.eus helbidera idatzita eros daitezke.