Txotxongiloak eraiki eta biziarazten ikasi

Urtero bezala, etxeko txikienek oporrak dituzten egun hauetarako, Topic-eko Pedagogia sailak tailerra antolatu du, «jostagarria eta hezigarria» izan nahi duena. Txikienak txotxongiloak eraikitzen eta hauek biziarazten ikasten aritu dira.

Egun bakoitzean, txotxongilo teknika ezberdin bat ezagutzen aritu dira eta asteartean, adibidez, paperez egindakoak osatu zituzten. «Horrekin identitatearen gaia landu genuen eta gaur, berriz, koreografiak jorratuko ditugu», esan zuen irakasleetako batek. Horretarako, paperezko edalontziak eta tela pusketak baliatuta aritu ziren umeak asteazkenean txotxongiloak egiten. Hurrengo egunetan, esate baterako, itzalekin jolasean ariko zirela iragarri zuten arduradunek.

Eraikitako txotxongilo bakoitza bakarra da eta tailerrean parte hartu duten umeek «modu ezberdin batean manipulatzen» ikasi dute. Sei urtetik gorako 16 umek eman zuten tailerrean izena eta ostirala arte jardun dute.

Topic-eko hirugarren solairuan elkartu dira horretarako goizeko 09:30etik 13:00ak arte, txotxongiloak eraiki eta biziarazten ikasteko.