Udaberriaren etorrerarekin batera, Tolosa&Co elkarteak antolatutako Braderie-a agenda tolosarretan egonkortutako hitzordua da jada. Zalantzarik gabe, gaurko ekitaldi nagusia izango da herrian, larunbateroko azokaren osagarri, eta aurten irekiera berezia egin dute: erretiroa hartu duten Mari Karmen Moreno (Maala'ko), Maria Pilar Amantegi (Phildar) eta Maite Jimenezi (Perfumeria/Estetika Maite) omenaldia egin diete, urtetan eta urtetan beren komertzioan egindako lanagatik.
Beñat Led elkarteko lehendakari berria azaldu du, aurrerantzean urtero egingo duten keinua izango dela; horrela, hiru emakumeek moztu dute Braderie-a ofizialki zabaltzeko xingola edo zinta.
Nerea Letamendia Tolosako Udaleko azoka eta turismo zinegotziak, bere aldetik, eskerrak eman dizkie omenduei, eta baita merkatari guztiei ere. Horrela, belaunaldi aldaketari begira jarri nahi izan du, merkatari gazte asko datozelako, eta horietako asko emakumeak direlako.
20:00etara bitarte, 80 postu izango dira kalean, eta festa girorik ere ez da falta izango, arratsaldean gimnastika erritmikoa eta Kalea txaranga ibiliko baitira, kalez kale.