Balorazio, oroitzapen eta errepaso egunek hartu ohi dute Tolosa, inauteriaren kaosak utzitako lasaitasun egunetan. Asteazkenetik larunbaterako arnasaldiaren ondoren, ordea, oasi txiki bat irekitzen da, igandean, aurreko sei festa egunek ase ez dutenentzat: Piñata igandea.
Garai bateko jendetzarik hartzen ez duen arren, Zaldunita osteko igandea ezinbesteko hitzordu izaten da, oraindik ere, tolosar askorentzat. Horrela, aurten ere ez da txaranga doinurik falta izango.
Batetik, Poca Tripa txarangak urteroko bisita egingo du Iurreamendi egoitzara, inauteri doinuz, 16:30ean. Ordu berean, gainera, zezen plazan zezen festa izango da, eta Kalean txarangak izango du 2017ko azken zezen festa girotzeko ardura.
Behin bi hitzorduak biribilduta, inauterizale nostalgikoenek aukera aparta izango dute, besotik heldu eta txarangen atzetik saltoka ibiltzeko, azken astean bezala, kalejira izango baita Tolosako kaleetan barrena.
Piñata igandeak behin betiko amaiera emango die 2017ko inauteriei; txarangak eta zezenak izango dira nagusi
Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!
EGIN ATARIKIDE!