Ertzaintzak goizean San Frantzisko pasealekuko taberna batetik deia jaso du. Esandakoaren arabera, borrokaldi bat izan da bertan eta ondorioz, gizonezko bat zauritu dute. Herritarren segurtasunerako patruila bat bertaratu da orduan eta gazte batek buruan zauria zuela ikusi dute. Jakin ahal izan dutenez, beste gizonezko batek edalontzi batekin jo du.
Osasun-zerbitzukoak ere bertaratu dira eta zauria ikusi ondoren, ospitale batera eraman dute. Liskarraren lekukoek esan diete ertzainei zein zen erasotzailea eta agenteek geldiarazi egin dute. Beharrezko egiaztapenak egin ondoren, lesio-delitu baten ustezko egilea delakoan atxilotu dute. Atxilotua polizia-dependentzietara eraman dute, bidezko tramiteak egiteko, epailearen aurrera eraman aurretik.