[Egunerokoa] Hobe Ostiral Mehe Ostegun Gizen baino

Egun hauetan zehar, festaz gozatzeaz gain, ezin ditugu alde batera utzi aldarrikapenak eta borroka. Horren adibide dugu txupinazioan gero eta aldarri gehiago aurkitzea: gazteak, animalistak, feministak,... ez dezatela esan herri hau geldirik dagoenik!

Ostegun gaua amaitu da, askok disfrutatu dezaten batzuk lanean igaro dutena. Goizean goiz garbiketa brigadak agertu dira, eta hurrengo egunerako dena txukun-txukun utzi dute; ikusten ez dugun arren oso azpimarragarria den lana.

Ostirala, aurreko eguneko goraldiaren ondoren lasaitasun eguna. Txosnagunean eskualdeko taldeen kontzertuak, belaunaldi berri eta zaharren konbinazio ederra. Tabernak beteta baina lasai egoteko aukera. Hau jakinda askok atera ohi duten ondorioa: hobe Ostiral Mehe Ostegun Gizen baino.

Hala ere, zoritxarrez, guztiok ez dugu aukera festaz gozatzeko, barroteen artean ez baitago ez txarangarik, ezta jai girorik ere. Paretetan, zezenetan, txosnetan... ez ditugu ahazten ziegetan ditugun lagun guztiak. Ostiral Mehean, batzuk txarangaren zain gauden bitartean, beste batzuk ostiralero bezala milaka kilometrotako bidaia egingo dute Tolosako kaleetako beroa maite ditugun pertsonei gerturatzeko asmoarekin!

Egoitz Garmendia