Hondarra lokatz egin da, jada, Tolosako zezen plazan. Eguraldiak tolosarren aldartearekin bat egin nahiko balu bezala, Ostiral Mehea gris esnatu da gaur eta, atzo suziria nola, gaur zerua lehertu da.
Inauterizaleak aspaldi zaildu ziren, ordea, meteorologiaren zaplaztekoen aurrean, eta zezen plaza lepo bete da, haur, gaztetxo nahiz gurasoz. Kabi Alai txarangarekin igoera egin, eta pottokak noiz irtengo zain egon dira gehienak; hondarretara jaisten ausartu edo ez ausartu erabakitzen, beste asko. Eta, nola ez, konfeti eta serpentinen magia sinplearekin liluratuta, txikienak.
Ajeari bizkarra eman, eta mozorro egunei aurpegia marrazten ari da Tolosa.