Txosnagunetik abiatu dira manifestariak 18:30ak inguruan, eta Tolosako alde zaharreko kaleak igaro dituzte. Tolosako gazte mugimenduaren eta Ezpala gaztetxearen aldeko oihuak egin dituzte ibilbidean zehar, eta txosnagunean amaitu dute manifestazioa.
Bertan, bi bertso kantatu dituzte gazte mugimenduko bi kidek, eta ondoren, Gazteak Kalean plataformako bik hitz egin dute. "Azken bi urteetan Tolosako gazte mugimenduak izan dituen errepresio kasuak" zerrendatu dituzte lehenengo. Plataformako kideek adierazi dute "sistemak beharrezkoa duela errepresioa bizirauteko eta bizitzako esparru guztietan eragiten duela".
Eraso horien aurrean, "egoera iraultzen jarraitu eta autodefentsa martxan" jarriko dutela azpimarratu dute. Hori horrela, martxoaren 11n Iruñean egingo den manifestazio nazionalean parte hartzeko deia egin dute: "Azken urteetan, Tolosan bezala, Euskal Herri osoan errepresioa jasan duten herri mugimendu ezberdinekin errepresioari autodefentsa bidez erantzungo diogu", adierazi dute.