Tolosaldeko Giltzarria egitasmoak datorren martxoaren 19rako deitutako galdeketara dei egiteaz gain, eskualdeko Euskal Herria Bilduk baiezko botoaren aldeko kanpaina egingo du. Hala iragarri zuten, duela bi aste egindako batzar irekian, eta hala berretsi dute orain.
«Erabakitzeko eskubidea bizitzaren ardatzean» jarri nahian, erabakian «parte hartzeko» garaia dela nabarmendu du Amaia Azkue EH Bilduko kideak. Horrela, martxoaren 19an 28 herrietako bizilagunek erantzun beharko duten galdera ere hizpide izan du: «'Nahi al duzu euskal estatu burujabe bateko kide izan?' EH Bilduk argi du: bai. Garaia da Euskal Herriaren etorkizuna marrazten hasteko, eta ba al da baiezkoa esatea baino gauza ederragorik?».
Horrela beraz, galdeketa girotzeko helburuz, Euskal Herriko prozesu subiranista alderatuko dute Herrialde Katalanetakoekin, «kataluniarrak erreferente direlako» EH Bildurentzat.
Solasaldi bat prestatu dute bi errealitateez aritzeko, datorren martxoaren 9an: EH Bilduko Marian Beitialarrangoitia eta CUPeko David Fernandez Topic zentroko aretoan ariko dira, 19:00etatik aurrera.
Martxoaren 19ko galdeketan baiezko botoa eskatuko du koalizioak.
Ez diogu hau kapritxo hutsagatik: lagundu iezaguzu. Eduki hau guztia doan ikusten duzu ez dugulako irudikatzen euskarazko hitzik gabeko Tolosalderik. Atarikide, iragarle eta erakunde askoren laguntzarik gabe ezinezkoa litzateke. Zenbat eta komunitate handiagoa sortu, orduan eta sendoagoa izango da ATARIA: zurekin, zuekin. Ez utzi biharko gaur egin dezakezuna: egin zaitez Atarikide!
EGIN ATARIKIDE!