Hilabete pasatxo baino ez da geratzen, Tolosaldeko herritarrek zein nazio eredu nahi ote duten erabakitzeko; hautetsontziak zabaltzeko. Tolosaldeko Giltzarriak aspaldi ekin zion atzera-kontuari, baina datozen asteotan motorrak ahalik eta gehien berotzeko hainbat hitzordu prestatu dituzte, biharkoa kasu: Zertarako erabaki? izenburupean, erabakitze eskubidearen inguruko mahai ingurua izango da, Leidor aretoan, 19:00etatik aurrera.
Arantxi Padilla kazetari billbonatarra moderatzaile lanetan ariko da, eta berak izango du hizlarien haria gidatzeko ardura. Iritziak mahai gainean jartzen eta garatzen, berriz, lau ahots ariko dira: Garbiñe Biurrun epaile tolosarra, batetik; Bernardo Atxaga idazlea, bestetik; eta, politikaren esparrutik, Marian Beitialarrangoitia eta Luke Uribe-Etxebarria bertaratuko dira hitzordura. Jokin Bildarratz tolosarra parte hartzekoa zen, baina, azkenean ez da posible izan.
Kataluniarrei babesa
Bihar iluntzeko hitzordua asteko lehena izango da, izan ere, Gure Esku Dago egitasmoak deialdia egin du datorren iganderako.
Herrialde Katalanetako prozesu subiranistari elkartasuna eskaintzeko helburuz, Hego Euskal Herriko lau hiriburuetan mobilizazioak izango dira, 12:00etan. Tolosaldeko Giltzarriak ere dei egin du, Donostiako Bulebarreko hitzordura bertaratzera.