Astearen hasieran neguko arropa bildu eta Belgradora eramateko asmoa azaldu zuen tolosar talde batek, han errefuxiatuen artean banatzeko. Bidairako gastuak betetzeko behar zuten dirua eta arropa biltzeko bi egun jarri zituzten, baina, bakarrarekin nahikoa izan da aurreikuspen guztiak gainditzeko. Bi furgoneta bete ordez, bi kamioi betetzeko adina erropa pilatu dute, San Frantzisko elizako arkupeak betetzeraino, 220 zaku. Diru laguntza ere ez da motz geratu, 25.000 euro batu baitira herritarrek eginiko ekarpenetatik.
Herritarren laguntza ez da erropa eta dirua ematera mugatu, gainera. Bilketa egiten laguntzera joandakoak asko izan dira, baita arropa sailkatzen lagundu dutenak, kamioiak kargatzen aritu direnak edota bidairako janaria prestatu dutenak. Elkartasun deiari bete betean erantzun diote herritarrek, eta horregatik, erabat eskertuta daude ekimenaren atzean dauden Bidaiarien Txokoa eta Zumardia elkarteko kideak.
100 lagun inguru gerturatu dira goizean goiz bigarren kamioia kargatzen laguntzera. Lanak gogotsu egin ondoren, arropaz beteriko kamioia errepidean jarri da Belgradorako bidean. Kamioiaren atzetik abiatu da furgoneta. Bertan doazen sei lagunek Belgradon ikusiko dituzte berriro kamioiak, eta han errefuxiatuen artean egingo den banaketaren lekuko izango dira.
