Aterperik eza, hotza, gosea eta jaioterria halabeharrez uztearen samina. Hori guztia eta beste hamaika zauri imajinaezin izan ditzake errefuxiatu batek, eta gutxienez zauri horietako bat ixtea da tolosar talde baten helburua. Igandean, 07:00etan irtengo dira Belgradora (Serbia) bidean, eta negurik gordinenari aurre egiteko arropak biltzen hasi dira, gaur goizean.
Deialdiak erantzun bakarra izan du: elkartasuna zakuka. Izan ere, San Frantzisko elizako aterpea txiki geratzen ari da herritarrak eramaten ari diren arropa pilaren ondorioz.
Bihar arte zabalik izango da arropa eta ekarpen ekonomikoa egiteko aukera. Izan ere, bidaiaren gastuei aurre egiteko laguntza beharko dute.