Hilabete pasatxo baino ez da geratzen tolosarren oasia leher dadin, eta herria murgiltzen ari da, jada, inauterietako prestakuntzetan. Tolosako Udalak zabaldu berri du karroza eta konpartsen izen-ematea, eta otsailaren 17ra bitarte aukera izango da horretarako.
Bi bide eskani dituzte, gainera, lehiaketan parte hartu nahi dutenentzat. Batetik, www.tolosa.eus webgunetik izena eman ahal izango da eta, bestela, kultur etxeko sarreran bertan aukera eskainiko dute; 10:00etatik 13:00era eta 16:00etatik 19:00etara izango da ordutegia.
Aipatzekoa da, Ferialekua ari dela karrozaz betetzen eta, azken urteetako bideari jarraituz, udalak Usabalgo pabiloia ere atondu duela, inauterizaleen ideiarik zoroenak garatu ahal izateko. Konpartsa txikientzat, berriz, Tolargiren pabiloia egokitu dute.
Informazio xehatua nahiz dokumentazioa eskuratu nahi dutenek, www.tolosa.eus/inauteriak ataria bisitatu besterik ez dute egin beharko.