Hego Euskal Herrirako iragarritako alerta laranjak ez du hutsik egin, eta azken egunotan botatako euriteek nabarmen igo dute ibaien emaria. Horrela, Araxes ibaia ateratzear da Tolosa parean, eta goizean goizetik lanean ari dira, Usabal industrialdean.
09:30ak aldera, udaltzainak autoak ateratzen ari ziren lur azpiko aparkaleku batetik, Amarotz auzoko Iruñea etorbidearen atzealdean. Aldameneko enpresan, berriz, ondatzeko arriskuan zegoen materiala ateratzen aritu dira langileak.
Ibaiaren bestaldean ziren Tolosako udal gobernuko kideak; ingurura bertaratu dira, eta udaltzainek egin diete lehen balantzea. Izan ere, ibai ertzaz harago, Usabal industrialdean putzu handiak sortu dira, euriteen ondorioz. Nabarmenena, kiroldegitik industrialderako bidea N-1 errepidearen azpitik igaro beharreko gunea: igerileku erraldoia zirudien bideak, eta ibilgailuen joan-etorria oztopatu du.
Langile eta udaltzainekin batera, asko izan dira eguraldiaren egoerarik muturrekoenak erretratatzera bertaratu diren herritarrak ere, argazki kamerekin.
Aipatzekoa da, Oria ibaia ere oso goian dagoela baina, momentuz, ez dirudi bere bidetik atera eta gainezka egingo duenik. Villabonan eta Zizurkilen ere adi egon beharko dute herritarrek, ura oso goian baitator Tolosa aldetik. Hala ere, datozen orduetan euriak atertzera egitea, eta hotza gailentzea aurreikusi dute meteorologia agentziek.
Hernialdeko zubia, itxita
Anoetatik Tolosara bidean, Hernialdeko bidegurutzea itxita dago; putzu handia sortu da euriteagatik.
Asteasu erreka berriz hazita dator eta Zizurkilgo Aurrera parean dagoen zubiaren begia erabat tapatu du urak. Oraingoz, ez du gainezka egin.
Indar handiz dator Oria ibaia eta Villabonan, Ulako etxeen parean, ia mugaraino iritsi baina ez dira atera urak. Duela hilabete gutxi bukatu dituzte Oria ibaia bideratzeko lanak Villabonan eta besteak beste, errekaren ezker pareta egokitu dute uholdeak ekiditeko.
