Tolosako Hirukide ikastetxeak urteak daramatza bizikidetzaren inguruko eragile eta erakundeekin harreman sareak sustatzen, eskola barruko proiektua elikatzeko. Orain arte world cafe edo tertulia formatoan egindako lana, ordea, beste forma eta neurri batean aurkeztuko dute aurten: Tabakaleran ekitaldi irekia egingo dute gaur goizean.
Txaro Etxeberria eta Pello Agirrezabal arduradunek nabarmendu dutenez, bizikidetza nahiz jazarpenaren bullyingaren prebentzioa lantzeko «hainbat programa» dituzte ikastetxean, eta lanketa horiek guztiak biltzen dituen egitasmoa aurkeztuko dute gaur: KIDE (Kidetasunerako Dinamikak Eskolan).
Besteak beste, «ikasleak gure gizartean bizitzeko» hezten dituztela dio Agirrezabalek, helburu garbi batekin: «Gatazka baten aurrean erabili ahal izateko tresnak eskaini nahi dizkiegu, eta horretarako adimen emozionalean oinarritutako programa bat sistematizatuta dugu, 3 urtetik 12 urtera bitarteko gaztetxoentzat».
Lanketa horren guztiaren esperientzia, beraz, Aritz Anasagasti adimen emozionalean adituaren hitzaldiarekin biribilduko dute, eta ikasleek jazarpena azaltzeko antzerki mutua ere eskainiko dute, Elena Aranbarriren zuzendaritzapean. Azkenik, erakundeetako ordezkarien mahai ingurua ere izango dute, Iker Usonek moderatuta.
Tabakalean Kutxa Kultur fundazioak duen egoitzan izango da ekitaldia, eta Hirukiderekin lotura dutenei gonbidapena iritsi bazaie ere, «hitzordu irekia» izango dela azaldu dute arduradunek.
Adimen emozionala abiapuntu hartuta, bullyinga nahiz bestelako gatazkak konpontzeari begira jarriko dira, bizikidetza lantzeko egitasmoan.
ATARIA ez da soilik komunikabide bat: komunitate baten ahotsa da, eta urte hauen guztien ondoren, zuen babesa behar dugu, inoiz baino gehiago: ATARIAk behar du Tolosaldea. Horregatik erronka bat daukagu esku artean: gure eskualdeko 28 herrietan hamarna harpidedun berri behar ditugu. Zu falta zara, bazatoz?
EGIN ATARIKIDE!