Jon Ander Peñak 19 urterekin debutatu du profesionaletan, Asegarce enpresarekin. Maila horretara iristen den bigarren esku pilotari tolosarra da, Mikel Belloso eta gero. Debuteko partida etxean jarri dio enpresak, eta zaletuek ez dute hutsik egin. Peña II.aren lagunak, senideak eta herritarrak itxura ona eman diote frontoiari, eta neurriko erantzuna eman die pilotariak, nahiz eta Oinatz Bengoetxea bezalako aurkaria izan aurrean.
Urdinei egokitu zaie lehen sakea eta Jon Anderrek eman dio hasiera partidari. Berea izan da partidako lehen tantoa, profesionaletako lehena, ezker-gantxo bizi eta bikain gurutzatutako bat tarteko, Bengoetxearen hanka bizkorrek ere harrapatu ezin izan dutena. Aurretik izan dira Peña eta Albisu seigarren tantora arte, hemen aurre hartu diete gorriek eta hala joan dira hogeita biraino, batzuen eta besteen tantoak tartekatuz. Albisuk, partida ona egin badu ere, ez du lortu Imaz gaztea mende-mendean hartzea eta leitzarrak, Bengoetxeak, profesionaletan zer aurkituko duen ederki erakutsi dio Peña II.ari, defentsan batik bat: orain arte tanto izango ziren pilota bat baino gehiago jiratu dizkio.
Jon Ander ausart aritu da. Asko gustatu zaigu defentsan egindako lana, zabalean zein txokoan ondo atera ditu Bengoetxean bidalitako pilota bihurri asko. Erasoan, berriz, beti asmatu ez badu ere, sei tanto egin eta zortzi galdu ditu jokaldian, erabaki egokiak hartu ditu gehienetan eta tanto ederrak eskaini dizkigu: aipatutako partidako lehena eta zazpi, bederatzi eta hamabigarrena egiteko jo dituen ezker gantxoak esaterako. Postura guztietan moldatzen dela eta pilotakada luzeko pilotaria dela ere erakutsi digu, hamaikagarren koadro ezkerrez jo eta Imazek itzuli ezinik utzi duen zartakoa lekuko.
Merezi du aipamena frontoira ekarri duen zalego gazteak eta partida osoan eman dion babesak: tanto egiten zuen bakoitzean sekulako festa jarri dute, eta huts egindakoan ere ez zaizkio babes oihuak falta. Egun handia izan da Jon Anderrentzat eta halaxe bizi arazi digute bere lagunek.
Hasi besterik ez da egin hau, eta nahiz eta partida irabazterik ez lortu, frontoian izan garenoi gustatu zaigu bere lana eta jarrera.
Jon Ander Peña:
Oinatz Bengoetxea: