ETAren amaiera azpimarratu du Urkullu lehendakariak ekitaldian: "Guztion lorpena izan da; izugarrizko sufrimenduko eta ahalegin askoko urteak izan dira, baina orain, errealitatea da".
Lehendakariak nabarmendu du Eusko Jaurlaritzak "autokritika" egin duela biktimekin batera eta biktima "guztiak" errekonozitu dituztela, "inolako salbuespenik gabe".
Etorkizunera begiratzeko beharra nabarmendu du: "Bizikidetza oinarri izango duen etorkizuna nahi badugu, beharrezkoa da autokritika egitea".
Bizikidetza eta Giza Eskubideen Plan berria proposatu du Urkulluk, "elkarbizitza integratzailea lortzeko". Azpimarratu du ETAK armak utzi eta desagertu egin behar duela: "Oztopoa da politikarentzat eta euskal gizartearentzat". Era berean, adierazi du lanean jarraituko dutela indarkeriaren bukaera "ordenatua" lortzeko.